भद्रपुर, ५ माघ । सामान्य प्रशासन मन्त्री लालबाबु पण्डितले नेपालको विकासमा गुणस्तरको कमी रहेको बताउनुभएको छ ।

भद्रपुर नगरपालिकाको २१ औँ नगर परिषद्बाट पारित आर्थिक वर्ष २०७२/७३ को बजेट नीति तथा कार्यक्रम पुस्तिकाको आज यहाँ लोकार्पण गर्दै उहाँले आफ्नो कर्तव्य पालना गरेर गौरवान्वित बन्न राष्ट्रसेवक कर्मचारीलाई आग्रह गर्नुभयो ।

कमजोर सोचले मुलुकको समग्र विकास नभएकामा चिन्ता व्यक्त गर्दै उहाँले हरेक राष्ट्रसेवकमा आत्मगौरव एवम् निष्ठा भएमा नेपाल बनाउन समय नलाग्ने ठोकुवा गर्नुभयो ।

उहाँले वैदेशिक रोजगारमा रहेका ३५ लाख युवालाई स्वदेशकै काममा फर्काउन नसकेमा नेपाल वृद्धवृद्धाको देश मात्र हुने स्पष्ट पार्नुभयो ।

प्रमुख जिल्ला अधिकारी तेजप्रसाद पौडेलले भद्रपुर नगरपालिकाले आम नागरिकलाई अनुभूति हुने किसिमको विकास योजना अघि बढाउनुपर्नेमा जोड दिनुभयो ।

स्थानीय विकास अधिकारी फणिन्द्र दाहालले आर्थिक वर्ष २०७२/७३ का लागि कुल रु १२ करोड ५० लाखको अनुमानित आय–व्यय प्रस्तुत गर्दै यसमा प्रशासनिक खर्च १५.७२ प्रतिशत र कार्यक्रम तथा विकास खर्च ८४.२८ प्रतिशत रहेको जानकारी दिनुभयो ।