ठक्कर दिई फरार भएका बस चालक राजवंशी पक्राउ

भद्रपुर, ४ माघ । दुईजनाको ज्यान जानेगरी पछाडिबाट ठक्कर दिई फरार भएका बस चालक भीमबहादुर राजवंशी आज पक्राउ परेको जिल्ला प्रहरी कार्यालय झापाले जनाएको छ ।

विर्तामोडबाट झापाको बनियानीतर्फ आइरहेको मे १ ख ४२३ नं को यात्रुबाहक बसले भद्रपुर नगरपालिकाको भानुचोक स्थित को ४ प ४०८० नं को मोटरसाइकललाई हिजो दिउँसो ठक्कर दिएको थियो ।

ठक्करले मोटरसाइकलको पछाडि बसेका बनियानी–६ निवासी ४२ वर्षीय जय कटेलको घटनास्थलमै र घाइते भई उपचारका लागि भारत सिलिगुडी लगिएका मोटरसाइकल चालक ५२ वर्षीय गोपाल मण्डलको गएराति २ बजे उपचारका क्रममा मृत्यु भएको थियो ।

घटनामा स्थानीय ७० वर्षीया वृद्धा सुमित्रा राई सामान्य घाइते हुनुभएको थियो ।

सोही विषयलाई लिएर मृतकका समर्थकले आज दिउँसो चन्द्रगढी बजार र यातायात ठप्प पारेका थिए ।

दोषीलाई कारबाही हुनुपर्ने र पीडितलाई उचित क्षतिपूर्ति दिनुपर्ने बन्दकर्ताले माग राखेका छन् ।