नेपालसामु युगान्डाद्वारा १४७ रनको चुनौती

काठमाडौँ, ३ माघ । आइसिसी विश्व लिग क्रिकेट डिभिजन दुईको पहिलो खेलमा प्रतिद्वन्द्वी युगान्डाले नेपालसामु १४७ रनको चुनौती दिएको छ ।

युगान्डाले अन्तिम बल खेल्नुअघि सबै विकेट गुमाएर १४६ रनमा समेटिएको थियो । युगान्डालाई सस्तैमा समेट्न नेपालबाट कप्तान पारस खड्काले तीन, बसन्त रेग्मी र सोमपाल कामीले दुई र शक्ति गौचनले एक विकेट लिएका थिए ।

नामिबियाको विन्डोहोक मैदानमा दिउँसो १ बजेदेखि सुरु भएको खेलमा टस जितेर युगान्डाले नेपाललाई फिल्डिङको निम्तो दिएको थियो ।

नेपालको डिभिजन दुईमा यो दोस्रो सहभागिता हो । केही महिनाअघि मलेसियामा सम्पन्न आइसिसी विश्व लिग क्रिकेट डिभिजन तीनको उपाधि चुम्दै नेपाल विजेता बनी तथा युगान्डा उपविजेता बन्दै डिभिजन दुईमा प्रवेश गरेका थिए ।

त्यस्तै यसअघि सन् २०१३ मा बर्मुडामा भएको डिभिजन तीनमा पनि नेपालले युगान्डालाई नै फाइनल खेलमा छ विकेटले हराउँदै च्याम्पियन बनेको थियो । अहिलेसम्म नेपाल र युगान्डा पाँचपटक भिडेका छन् जसमा नेपालका पक्षमा तीन र युगान्डाको पक्षमा दुई खेल छ ।

प्रतियोगितामा नेपालसहित युगान्डा, नेदरल्यान्ड, आयोजक नामिबिया, केन्या र क्यानडाले प्रतिस्पर्धा गर्दैछन् । प्रतियोगितामा शीर्ष दुई स्थान हासिल गर्ने टोलीले आइसिसी विश्व लिग च्याम्पियनसिप र इन्टरकन्टिनेन्टल फोर डे प्रतियोगितामा सहभागिता जनाउने अवसर पाउनेछ ।