दूधको मूल्यमा वृद्धि

बाँके (खजुरा), ३ माघ । बाँके जिल्लामा दूधको मूल्य वृद्धि गरिएको छ ।

जिल्ला दुग्ध व्यवसायी सङ्घ बाँकेका अनुसार जिल्लामा दूधको मूल्यमा प्रतिकिलो रु १० ले वृद्धि गरिएको हो ।

सङ्घका अनुसार दूधको मूल्य प्रतिकिलो रु ५२ बाट बढेर अब रु ६२ पर्ने छ । त्यस्तै राम्रो दूधको मूल्यमा भने रु आठ वृद्धि गरी ५० बाट रु ५८ बनाइएको सङ्घले जनाएको छ ।

यसअघि गत पुस २३ गते बसेको दूध व्यवसायी सङ्घको बैठकले दूध र दूधबाट तयार गरिने परिकारको मूल्य वृद्धि गर्ने निर्णय गरेको थियो ।

हाल सादा दहीको मूल्य रु ७० प्रतिकिलो रहेको छ भने रु ८० प्रतिकिलो रहेको मिठो दहीको मूल्य रु ९० निर्धारण गरिएको छ ।

यसैगरी यसअघि रु ४५० प्रतिकिलो पाइने पनिरको मूल्य अबदेखि रु ५०० मा प्राप्त गर्न सकिने छ । घ्यूको मूल्यमा प्रतिलिटर रु १०० ले वृद्धि भएको सङ्घका अध्यक्ष बदुरुद्धिन अन्सारीले जानकारी दिनुभयो ।

यसअघि रु ७०० रहेको घ्यूको मूल्य अब रु ८०० हुने भएको छ । अध्यक्ष अन्सारीले सरकारले गत पुस १६ गतेबाट नै दूधको मूल्य बढाएपछि व्यवसायीले समेत वृद्धि गर्न बाध्य भएको बताउनुभयो ।