अमेरिकामा डा कार्की र भारतमा उपाध्याय राजदूत सिफारिस

काठमाडौँ, २ माघ । सरकारले लामो समयपछि आज छिमेकी मुलुक भारत र अमेरिकामा आवासीय राजदूतका लागि क्रमशः दीपकुमार उपाध्याय र डा अर्जुनकुमार कार्कीलाई आज सिफारिस गरेको छ ।

मन्त्रिपरिषद्को बैठकले भारतमा आवासीय र भुटानमा गैरआवासीय राजदूतका रुपमा नेपाली काँग्रेसका केन्द्रीय सदस्य दीपकुमार उपाध्याय तथा संयुक्त राज्य अमेरिकाका लागि आवासीय एवम् कोलम्बिया, मेक्सिको, हुन्डुरस, ग्वाटेमाला, कोस्टारिका, निकारागुवा र गायनाका लागि गैरआवासीय राजदूतका रुपमा डा कार्कीलाई नियुक्तिका सिफारिस गरेको सरकारका प्रवक्ता डा मीनेन्द्र रिजालले जानकारी दिनुभयो ।

सरकारले औद्योगिक क्षेत्र व्यवस्थापन लिमिटेडका महाप्रबन्धकमा गौतममान श्रेष्ठ र हेटौँडा सिमेन्ट उद्योग लिमिटेडका महाप्रबन्धकमा प्रेमशङ्कर सिंहलाई नियुक्त गर्ने निर्णय गरेको सूचना तथा सञ्चारमन्त्री डा रिजालले जानकारी दिनुुभयो ।

सरकारले युवाहरुलाई व्यावसायिक कृषि कर्जामा छ प्रतिशतभन्दा बढी व्याज तिर्नुनपर्ने सहुलियत अनुदानसम्बन्धी कार्य पहिलो संशोधन कार्यविधि पारित गरेको छ । त्यस्तै ग्रीडको सौर्य ऊर्जा र ऊर्जा प्रभावकारिकता आयोजनाका लागि विश्व बैंक समूहको १३० मिलियन डलर अन्तर्राष्ट्रिय विकास संस्थाबाट ऋण सहायता प्राप्त गर्न अख्तियारी दिने निर्णय भएको छ ।

सरकारले अन्नपूर्ण संरक्षण क्षेत्रको व्यवस्थापन गर्दै आएको प्रकृति संरक्षण कोषको जिम्मेवारी यही माघ ४ गते समाप्त हुन लागेकाले त्यस अवधिलाई बढाएर पाँच वर्ष थप गरेको छ । एक वर्षभित्र व्यवस्थापन नियमावली निर्माण गर्नाका साथै त्यसमा संयुक्त रुपमा व्यवस्थापनका लागि स्थानीय समुदायको क्षमता अभिवृद्धि गरी सो अवधिको अन्त्यसम्ममा क्षेत्रको सम्पूर्ण व्यवस्थापन स्थानीयवासीले नै गर्ने कार्य अघि बढाउने निर्णय गरिएको छ ।