प्रेस चौतारीले साङ्केतिक रुपमा सभासद्लाई खाद्य सामग्री पठायो

चितवन, २ माघ । संविधान निर्माणको मिति नजिकिँदै गर्दा प्रेस चौतारी चितवनले साङ्केतिक रुपमा सभासद्हरुलाई खाद्य सामग्री पठाएको छ ।

आज चितवन प्रशासनमार्फत चौतारीले दाल, चामल, नुन तेल र बेसार गरी पाँच खाद्य सामग्री पठाएको प्रेस चौतारी चितवनका अध्यक्ष तीर्थ नेपालले जानकारी दिनुभयो ।

सभासद्हरुले रातदिन बसेर संविधान निर्माण गरुन् भन्ने उद्देश्यले खाद्य सामग्री संविधानसभा अध्यक्ष सुवास नेम्वाङ र सबै सभासद्हरुलाई पठाएको प्रेस चौतारी चितवनले जनाएको छ ।

केन्द्रीय कार्यक्रमअन्तर्गत भएको उक्त कार्यक्रममा बोल्दै प्रेस चौतारीका मध्यमाञ्चल अध्यक्ष तिलक रिमालले समयमै संविधान निर्माण गर्न दलहरुलाई आग्रह गर्नुभयो ।

यस्तै पत्रकार महासङ्घ चितवनका अध्यक्ष  हरिप्रसाद पोख्रेलले समयमै संविधान जारी नभए देशलाई नै असर गर्ने भन्दै दलहरुलाई ध्यानाकर्षण गराउनुभयो ।

यसअघि, प्रेस चौतारीले संविधान निर्माणका लागि दबाब स्वरुप चितवन प्रशासनमार्फत संविधानसभा अध्यक्षलाई एक ज्ञापनपत्र बुझाएको थियो ।