भारतको गङ्गा नदीमा ८० शव भेटिए

लखनउ, ३० पुस । भारतको गङ्गा नदीमा बुधबार ८० वटा शव भेटिएका छन् । सो नदीमा लाखौँ लाख हिन्दूधर्मावलम्बीले पूजाअर्चना गर्ने तथा स्नान गर्ने आस्थाको नदी हो ।

सो नदीमा हिन्दू धर्मावलम्बीले अन्तिम संस्कार पनि गर्ने गरिन्छ । सोही कारण उक्त नदीको पानीको गुणस्तर खस्किएको भनी चर्चा भइरहेकै बेला बुधबार ती शव तैरिएको अवस्थामा भेटिएका छन् ।

दशौँ लाख हिन्दूहरूको अन्त्येष्टि हुने गरेको सो नदीमा सोही कारणले पनि फोहर भएको चर्चा गर्ने गरिन्थ्यो ।

उत्तर प्रदेशमा एक घाट नजिकै ती शव तैरिएको अवस्थामा भेटिएका स्थानीय नागरिक र प्रहरीले जनाएका छन् । ती शव नदीमा अकस्मात् भेटिएपछि प्रहरीले निकालिरहेको बताइएको छ ।

साथै ती शवमा गिद्ध र कुकुर झुलिरहेका दृश्य पनि टेलिभिजनमा देखाइएको छ । पानीमा तैरिएका ती शवमा गिद्ध रमाएका दृश्य टिभीमा देखाइएको छ ।

सो नदीमा भेटिएका शवको सङ्ख्या त्योभन्दा पनि धेरै रहेको बताइन्छ । जिल्ला मेजिस्ट्रेट सौम्य अग्रवालले भने– हामीले अहिलेसम्म ८० वटा शव देखेका छौँ र सायद यो सङ्ख्या कम्तीमा पनि १०० पुग्न सक्छ ।

उहाँले यतिखेर नदीमा पानीको मात्रा बढ्न थालेकाले सो नदी किनारमा गाडिएका शव बाहिर निस्कएको हुन सक्ने अनुमान प्रहरीले गरेको छ ।

अग्रवालले भन्नुभयो– “के कति कारणले ती शव बाहिर आए भन्नेबारेमा अनुसन्धान सुरु गरिएको छ र यसका लागि चिकित्सकको एक टोली पनि त्यहाँ पठाइएको छ ।”

प्रहरीले नदी किनारमा अन्त्येष्टि गरेरै गाडिएका ती शव यतिखेर नदीको पानीमा तैरिन पुगेको अनुमान गरेको छ । रासस/एएफपी