प्रथम महिला तेक्वान्दो प्रतियोगिता आयोजना हुने

काठमाडौँ, ३० पुस । नेपाल तेक्वान्दो सङ्घ महिला सशक्तीकरण व्यवस्थापन समितिले प्रथम महिला तेक्वान्दो प्रतियोगिताको आयोजना गर्ने भएको छ ।

तेक्वान्दो खेलको इतिहासमा नै पहिलोपटक यस किसिमको प्रतियोगिता आयोजना गर्न लागेको समितिकी अध्यक्ष नन्दा बस्यालले आज यहाँ आयोजित पत्रकारसम्मेलनमा जानकारी दिनुभयो । प्रतियोगिता आगामी माघ २३ गतेदेखि सञ्चालन हुनेछ ।

प्रतियोगितामा पाँच विकास क्षेत्रको टिम, नेपाली सेना, नेपाल प्रहरी क्लब, सशस्त्र प्रहरी बल र विश्वविद्यालय टिम गरी नौ टिमले प्रतिस्पर्धा गर्ने अध्यक्ष बस्यालले बताउनुभयो ।

प्रतियोगितामा ३० केजी, ३२ केजी, ३४ केजी ३७ केजी, ४० केजी, ४३ केजी, ४६ केजी, ४९ केजी, ५३ केजी र ५७ केजीमुनिको तौलसमूहमा प्रतिस्पर्धा हुनेछ ।

त्रिपुरेश्वरस्थित राष्ट्रिय खेलकुद परिषद्को कभर्डहलमा हुने सो प्रतियोगितामा ९० जना खेलाडीले भाग लिनेछन् । तीन दिनसम्म सञ्चालन हुने उक्त प्रतियोगिता करिब रु १८ लाख १४ हजार ७०० खर्च लाग्ने आयोजकले जनाएको छ ।