बिहीबार, कार्तिक ६ २०७७
काठमाडौं १९:२१
वासिङटन डिसी 09:36

नक्कली शैक्षिक प्रमाणपत्रका एक हजार सातसय उजुरी अख्तियारमा

इनेप्लिज २०७१ पुष ३० गते ११:४१ मा प्रकाशित

CIAA1काठमाडौँ, ३० पुस । अख्तियार दुरुपयोग अनुसन्धान आयोगको सक्रियतासँगै नक्कली शैक्षिक प्रमाणपत्र पेस गरी सरकारी निकायमा जागिर खाने एक हजार सातसय कर्मचारीविरुद्ध आयोगमा उजुरी परेको छ ।

सबैभन्दा बढी शिक्षकले नक्कली शैक्षिक प्रमाणपत्र पेस गरेको उजुरी आयोगमा परेको छ ।  शिक्षकपछि क्रमशस् प्रहरी, संस्थान र निजामति प्रशासनका कर्मचारीविरुद्घ उजुरी परेको छ ।

सबैभन्दा बढी शिक्षकमा र सबैभन्दा कम निजामति कर्मचारीविरुद्ध नक्कली प्रमाणपत्रको उजुरी परेको आयोगका सहप्रवक्ता केशव घिमिरेले जानकारी दिनुभयो ।

पछिल्लो समयमा नक्कली प्रमाणपत्रको उजुरीबारे आयोगले छानविन सुरु गरेयताको दुई महिनामा मात्रै एक हजार भन्दा बढी शिक्षकले राजीनामा दिएका छन् । तीनसयभन्दा बढी वनरक्षकले राजीनामा दिएका छन् भने अन्य सरकारी निकायमा पनि राजीनामा दिनेको लर्को लागेको छ ।

आयोगले पहिलो चरणमा शिक्षकहरूका प्रमाणपत्रबारे छानविन सुरु गरेपछि शिक्षकले राजीनामा दिने क्रम बढेको हो । स्वदेश र  विदेशी विद्यालय तथा विश्वविद्यालयबाट शिक्षा हासिल गरेका शंकास्पद सबै शिक्षकको प्रमाणपत्रबारे आयोगले छानविन गरिरहेको छ ।

यसै आर्थिक वर्षको सुरुका छ महिनामै नक्कली प्रमाणपत्र लिने पचासभन्दा बढी व्यक्तिविरुद्ध आयोगले विशेष अदालत काठमाडौँमा मुद्दा दर्ता गरिसकेको छ ।

राजीनामा दिनेहरूले पारिवारिक कारण, स्वास्थ्यको कारण देखाउँदै राजीनामा दिने गरेको देखिएको छ । राजीनामाको कारण नक्कली प्रमाणपत्र हो कि व्यक्तिगत हो यसै भन्न नसकिएपनि छानविन सुरु भएलगत्तै राजीनामा दिनुले आशङ्का उत्पन्न गराएको सहप्रवक्ता घिमिरे बताउनुहुन्छ ।

आयोगमा उजुरी परेपछि राजीनामा दिने कर्मचारीको हकमा भने राजीनामापछि पनि छानविन जारीनै रहने उहाँले जानकारी दिनुभयो । तर उजुरी नपरेकाहरूले राजीनामा दिएको विषयमा भने आयोगले छानविन गरेको छैन ।

उजुरी नपर्दै राजीनामा दिनेका विषयमा भने आवश्यकता अनुसारमात्रै छानविन गर्ने गरेको तर राजीनामा दिने सबैको छानविन नगरिएको उहाँले बताउनुभयो । अहिले राजीनामा दिएका अधिकांशविरुद्ध उजुरी नपरेकाले उनीहरू कारबाहीबाट बच्ने अवस्था छ ।

आयोगका अनुसार डाक्टर, पाइलट, इञ्जिनियर, प्राध्यापक जस्ता उच्च ओहदाका निकायदेखि सुरक्षा निकाय र निजामती सेवाका उच्च निकायमा रहेका पदाधिकारीविरुद्धसमेत नक्कली प्रमाणपत्र लिएको उजुरी आयोगमा परेको छ ।

छानविनकै क्रममा आयोगले नेपाल वायुसेवा निगममा कार्यरत क्याप्टेन दीपेन्द्र प्रधान नक्कली प्रमाणपत्रको आधारमा सेवामा प्रवेश गरेको खुलेपछि उनीविरुद्ध गत कात्तिक १९ गते विशेष अदालतमा मुद्दा दर्ता गराएको थियो । उनै  प्रधानले चलाएको नेपाल वायुसेवा निगमको जहाज एक वर्षअघि जोमसोममा दुर्घटनाग्रस्त हुँदा सात जना घाइते भएका थिए ।

आयोगले छानविनलाई तिव्रता दिएसँगै नक्कली प्रमाणपत्र लिई जागीर खानेहरू धमाधम राजीनामा दिन थालेका छन् । यसले अब सरकारी निकायमा नक्कली प्रमाणपत्रधारीको उपस्थिति रहने सम्भावना न्युन भएको छ ।

उजुरी नपर्दै राजीनामा दिनेविरुद्ध कारबाहीको स्पष्ट कानुनी व्यवस्था नहुँदा र आयोगले पनि त्यसमा चासो नदिँदा नक्कली शैक्षिक प्रमाणपत्रधारीले फाइदा लिइरहेका छन् ।

नक्कली प्रमाणपत्रधारीहरूले राजीनामा दिने क्रम बढेसँगै सरकारी निकायले अब त्यस्ता व्यक्तिहरूबाट  उन्मुक्ति पाउने अवस्था देखिएको छ ।

प्रतिक्रिया