शनिबार, कार्तिक १५ २०७७
काठमाडौं ०१:५७
वासिङटन डिसी 16:12

कवयित्री र गीतकार -शान्ता घिमिरे

इनेप्लिज २०७१ पुष ३० गते ११:२८ मा प्रकाशित

Hom with Shanta Ghimire at NY 2014

शान्ता अधिकारी घिमिरेको जन्म दुराडाँडा, किरिन्चे, लमजुङ्गमा भएको हो । शान्ता अधिकारी घिमिरेको शान्त प्रकृति र मनोहर ध्वनीमा कविता र गीत वाचन गरेको सुन्न न्युयोर्कको साहित्यिक कार्यक्रममा जान नेपालीहरु लालायित हुन्छन् । यो पंक्तिकार उनको वाचनको वेला प्रतीक्षा गरेर बसेको हुन्छ । यो आफैमा यौटा कसी हो कि शान्ता घिमिरे कवयित्री र गीतकार अनि स्वभावले प्राकृतिक शौन्दर्य बोकेकी कवयित्री हुन् ।

शान्ता अधिकारी घिमिरे पुरानाकोट गा.वि.स. लमजुङमा जन्मी कलङ्की काठमाडौंमा घर सरी हाल न्युजर्सी अमेरिकामा बस्छिन् । उनको संलग्नता सदस्य अनेसास, अनेसास महिला सम्मेलन २०१४, ए एन ए २२ सौं डिसी सम्मेलन, नेपाली साहित्य प्रतिष्ठान आदि विभिन्न संघ संस्था र सम्मेलनमा रहेको देखिन्छ । उनका फुटकर गीत कविताहरु पत्र पत्रिका र वेभसाइटमा प्रकाशित भैरहेका छन् । प्रकाशित कृति ‘प्रवासी मन’ हो ।

यो २०१४ मा प्रकाशित कविता, मुक्तक, गीत, गजलको प्रकाशन हो । तापनि विधाको अभिलक्षण पालनभन्दा अभिव्यक्तिमा यिनलाई सफलता मिलेको छ (रावत.भूमिका) । विधागत सूत्रमा फिट नभए पनि लोकगीतमा रहस्य लुके जस्तै यो संग्रहमा डायस्पोराको पीडाको रहस्य लुकेको छ । सबै त होइन, केहीमा डायस्पोरामा भाषा र विधाको सूत्र प्रयोगमा अव्यवस्था भएको देखिन्छ एकातिर भने अर्कोतिर नेपाली ठेट नेपाली र भावना पनि ठेट नेपाली भाषा र भावना हुन्छ जुन शास्त्रीयतासित मेल खाँदैन । यो वर्गमा शान्ताको यो प्रवासी मन पर्छ । त्यस्तै अर्को वर्ग उनीहरु नेपाली भाषामा भरमार अंग्रेजी शब्दको प्रयोग गर्छन् र उनीहरुलाई पनि विधाका सूत्रको मतलव हुदैन । यो पछिल्लो वर्गको भाषामा डायस्पोरामा टुटेफुटेको अंग्रेजी मिश्रित भाषालाई पनि स्वीकार त गरेको छ तर भाषाको र भाव तथा साहित्यको विधागत खास केही विशेषताहरु त परिपालन गरिएकै हुनुपर्छ अन्यथा अव्यवस्था हुन्छ, हुने देखिन्छ । आज पुराना मूल्यलाई मान्यता नदिने र नयाँ मूल्यको स्थापना पनि गर्न नसक्ने साहित्य र शास्त्रको रोग लागेको वेला हो यो । यो अवस्थामा कला, साहित्य र दर्शन सबै शास्त्रकारहरु सचेत हुनु आवश्यक देखिन्छ ।

यो प्रवासीको मनमा प्रवासबाट नेपालको सम्झनामा मनमा बहेका बहका गीत छन् । यसैको पृ. १९, ७८ र ७९ अनुसार शान्ताको ‘समुद्रपारको माया’ भन्ने कृति पनि छ । तर त्यो पंक्तिकारको हातमा परेको छैन । यो प्रवासी मनमा गोविन्द गिरी ‘प्रेरण’ र निलम निहारिकाबाट शुभकामनाका गहकिला विचारहरु दिइएका छन् । डा. गोविन्द सिंह रावतको भूमिकले पनि अगाडि सारेको ‘सबै मान्छे नै हुन्’ कविता प्रंस्तुत छ र कवितालाई आजको शास्त्रीयतासित तालमेल मिलाएर अरु कृति प्रकाशित गरेमा कवयित्री शान्ता अधिकारी घिमिरेको साहित्य सेवाले पूर्णता पाउने छ ।

आखिर सबै मान्छे नै हुन्
जसले पनि जिउनु पर्छ
सुख दुःख रीत नै हो
फेरि पनि सिउनुपर्छ

प्रतिक्रिया