नौ फरार अपराधी पक्राउ

तुलसीपुर (दाङ), ३० पुस । राप्ती अञ्चल प्रहरी कार्यालय तुलसीपुरले फरार नौजना अपराधीलाई पक्राउ गरेको छ ।

जिल्ला अदालत दाङ र जिल्ला अदालत प्यूठानले विभिन्न मुद्दा तथा अपराधमा संलग्न ती व्यक्तिलाई विभिन्न मितिमा कैद र जरिवाना तोकिए पनि उनीहरु फरार थिए ।

राप्ती अञ्चल प्रहरी प्रमुख प्रहरी वरिष्ठ उपरीक्षक रमेशकुमार पाण्डेयले मातहतका निकायसँगको सहयोग र सहकार्यमा ती भगुवा अपराधीलाई दाङलगायत अन्य स्थानबाट केही समययता पक्राउ गरिएको बताउनुभयो ।

पक्राउ पर्नेमा जबर्जस्ती करणीको मुद्दामा फरार रहेका दाङकै गोविन्द सुनार र सन्तोष चौधरी तथा लेनदेन मुद्दाका केशरबहादुर बुढालगायत छन् ।

चालु आर्थिक वर्षको अहिलेसम्म राप्तीको दाङमा २५, रुकुममा ३३, रोल्पामा १५, सल्यानमा १२ र प्यूठानमा ११ अपराधी अझै भगुवाको सूचीमा रहेको राप्ती अञ्चल प्रहरी कार्यालय तुलसीपुरले जनाएको छ ।