सोमबार, कार्तिक १० २०७७
काठमाडौं १३:१४
वासिङटन डिसी 03:29

तस्करीको ‘पारवहन नाका’ बन्दै उत्तरी गोरखा

इनेप्लिज २०७१ पुष ३० गते ८:३५ मा प्रकाशित

Gorkha-Districtगोरखा, ३० पुस । सडक सञ्जाल नपुगेको उत्तरी गोरखा पछिल्लो समय तस्करीको ‘पारवहन नाका’ बन्दै गएको छ ।

सिर्दिवासमा रहेको लार्के भन्सार कार्यालयले काम नगर्दा उत्तरी गोरखा तस्करका लागि सजिलो नाका बन्दै गएको हो ।

सिमानामा भन्सार कार्यालय तथा सुरक्षा चौकी नहुँदा तिब्बत हँुदै प्रतिबन्धित वन्यजन्तुको छाला, हड्डी, जडीबुटी, तिब्बती सिक्का तथा तिब्बती शरणार्थी ओसारपसार र आवतजावत गर्ने ‘पारवहन नाका’ बनेको स्थानीय बासिन्दाले बताएका छन् ।

नेपालका विभिन्न सहर र भारतबाट यो नाका हुँदै चिरु (हिमाली जनावरको रौँ) सतुवा, रक्तचन्दन, जटामसी, निरमसी, पाँचऔँले, वन लसुन, यार्सागुम्बा, कस्तुरी, कस्तुरीको रौँ, बाघ, भालु, घोरल, झारल र मृगका छाला, हड्डी, चिनियाँ सिक्का तथा तिब्बती शरणार्थी ओसारपसार हुने गरेको स्थानीय बासिन्दा बताउँछन् ।

यस वर्ष पनि कस्तुरीको रौँसहित प्रहरीले सिर्दिवासका एक होटल सञ्चालकलाई पक्राउ गरी मनास्लु क्षेत्र संरक्षण आयोजना (एमक्याप)लाई बुझाएको छ । त्यस्तै प्रहरीले पटक–पटक गरी सतुवा, नाहुर, घोरल, वनलसुन, जनावरको हड्डी यहाँबाट बरामद गर्दैआएको छ ।

सिर्दिवासको जगतस्थित भन्सार कार्यालय २०५६ सालमा विस्थापित भएपछि तस्करका लागि उत्तरी गोरखा सहज भएको हो । त्यसका साथै प्रहरी चौकी जगतबाट फिलिम सरेपछि तस्करका लागि झनै सहज भएको हो ।

फिलिममा चौकी राखेपछि विभिन्न वैकल्पिक बाटो हँुदै सामान तथा तिब्बती शरणार्थी वारपार हुने गरेको स्थानीय जनताको भनाइ छ । साथै बाटो छेकेर रकम असुल्ने युवा र लुटेराहरु पनि उत्तरी क्षेत्रमा रहेको एक स्थानीयवासीले जनाएका छन् ।

गोरखाका प्रमुख जिल्ला अधिकारी उद्धव तिमल्सेनाले तस्करी रोक्न तथा मनास्लु पर्यटन पदमार्ग हुँदै उत्तरी भेग पुगेका पर्यटकलाई सुरक्षा दिन सुरक्षा चौकी राख्ने पहल भइरहेको जानकारी दिनुभयो ।

प्रतिक्रिया