कारगारका बालबालिकालाई सहयोग

वीरगन्ज (पर्सा), ३० पुस । वीरगन्ज कारगारभित्र अभिभावकसँगै जेल जीवन बिताउन बाध्य बालबालिकालाई सहयोग गर्ने सहयोगीको सङ्ख्या बढ्दै गइरहेको छ ।

यसै क्रममा मङ्गलबार कारागार परिसरमा रहेको समता विद्यालयमा अध्ययनरत कैदीबन्दीका बालबालिकालाई लायन्स क्लबअन्तर्गतका विभिन्न समूहले जुत्ता, मोजा र शैक्षिक सामग्री वितरण गरेको छ ।

लायन्स क्लबका संस्थापक मेल्वीनको जन्मजयन्तीको अवसरमा समता स्कुलका विद्यार्थीलाई जाडोमा लगाउने ७५ जोर जुत्ता मोजा र शैक्षिक सामग्री वितरण गरेको विद्यार्थी नेता दिलीप कार्कीले जानकारी दिनुभयो ।

यसैगरी वीरगन्ज आदर्शनगरमा रहेको नेपाल बङ्गलादेश बैंक शाखा कार्यालयले पनि विद्यालयको पुस्तकालयका लागि एकथान दराज, कम्प्युटर ल्याबका लागि आवश्यक छ थान कुर्सी र बालबालिकालाई बस्ने कार्पेट तथा बालबालिकाको खाजाका लागि तीन कार्टुन चाउचाउ वितरण गरेको छ ।

नेपाल बङ्गलादेश बैंक वीरगन्जका शाखा प्रबन्धक प्रमिला मानन्धरले विद्यालयकी प्रधानाध्यापक खातुनलाई ती सामग्री हस्तान्तरण गर्नुभयो । वीरगन्ज कारगारभित्र सञ्चालित समता विद्यालय गएको वैशाख महिनाबाट सञ्चालनमा रहेको छ ।