कञ्चनपुरमा मावनअधिकार कार्यान्वयन तथा अनुगमन समिति

बेलौरी (कञ्चनपुर), ३० पुस । कञ्चनपुरमा राष्ट्रिय मानवअधिकार कार्य योजना कार्यान्वयन तथा अनुगमन समिति गठन गरिएको छ ।

जिल्ला प्रशासन कार्यालयमा मङ्गलबार बसेको बैठकले प्रमुख जिल्ला अधिकारी कृष्णचन्द्र घिमिरेको संयोजकत्वमा १३ सदस्यीय अनुगमन समिति गठन गरेको हो । समितिमा स्थानीय विकास अधिकारी, जिल्ला शिक्षा अधिकारी, जिल्ला जनस्वास्थ्य प्रमुख, जिल्ला न्यायाधिवक्ता र महिला विकास अधिकृत सदस्य रहने छन् ।

यस्तै सहायक प्रमुख जिल्ला अधिकारी सदस्य सचिव रहेको समितिमा नेपाल बार एसोसिएसन, नेपाल पत्रकार महासङ्घ र गैरसरकारी संस्था महासङ्घका प्रतिनिधि पनि समितिको सदस्य रहने व्यवस्था गरिएको छ ।

बैठकले इन्सेक, महिला मानवअधिकार रक्षक सञ्जाल र कानुन अन्वेषण तथा स्रोत विकास केन्द्र सेलर्डलाई आमन्त्रित सदस्यमा मनोनयन गरेको छ । बैठकले इन्सेकको संयोजकत्वमा सलर्ड र प्रशासकीय अधिकृत सदस्य रहेको मानवअधिकार प्रतिवेदन तयारी समिति पनि चयन गरेको छ ।

सरकारको चौथो पञ्चवर्षीय राष्ट्रिय मानवअधिकार कार्ययोजनालाई सघाउन समिति गठन गरिएको प्रमुख जिल्ला अधिकारी घिमिरेले बताउनुभयो ।

उहाँका अनुसार समितिले जिल्लाको मानवअधिकारको अवस्था अध्ययन गरेर तीन–तीन महिनामा गृहमन्त्रालयमार्फत सरकारलाई प्रतिवेदन पठाउने छ ।