बुधबार, कार्तिक ५ २०७७
काठमाडौं १८:५२
वासिङटन डिसी 09:07

तीस दलीय मोर्चाको बन्दको प्रभाव आंशिक रह्यो: गृह मन्त्रालय

इनेप्लिज २०७१ पुष २९ गते १४:४५ मा प्रकाशित

काठमाडौँ, २९ पुस । एकीकृत नेकपा (माओवादी) नेतृत्वको तीसदलीय मोर्चाले आज आह्वान गरेको बन्दको आंशिक प्रभाव परेको छ ।

बन्दका क्रममा आज सिरहा, सुनसरी, झापा, बाँके, मोरङ, मकवानपुर र महोत्तरीमा केही सवारीसाधनमा तोडफोड भएको र त्यसबाट ती जिल्लाको जनजीवनमा सामान्य प्रभाव परेको गृह मन्त्रालयले जनाएको छ । तराईका जिल्लामा जबर्जस्ती बन्द गर्दै हिँडेका सात जनालाई प्रहरीले नियन्त्रणमा लिएको थियो ।

त्यसैगरी मध्यमाञ्चल क्षेत्रमा पनि बन्दको प्रभाव आंशिक रुपमा परेको, बजार क्षेत्र पनि आंशिक रुपमा खुलेको र  यातायातका साधन कम मात्रामा चलेको जनाउँदै मन्त्रालयले लामो दूरीका यातायातका केही साधनलाई सुरक्षा प्रदान गरेर गन्तव्यसम्म पुर्‍याइएको बताएको छ ।

काठमाण्डौं उपत्यकामा बन्दकर्ताले केही सवारीसाधनमा तोडफोड गरेको तथा त्यस क्रममा तीन महिलासहित ६९ जनालाई पक्राउ गरिएको मन्त्रालयले केहीबेरअघि जारी गरेको प्रेस विज्ञप्तिमा जनाइएको छ ।

मन्त्रालयले शान्ति सुरक्षाको व्यवस्थालाई थप भरपर्दो र विश्वसनीय बनाउन सुरक्षा निकायबीच समन्वय कायम गर्दै योजनाबद्धरुपमा सुरक्षाकर्मी परिचालन गरिएकाले आआफ्ना सेवा, व्यावसाय निर्बाधरुपमा सञ्चालन गर्न सम्पूर्ण यातायात व्यावसायी, उद्यमी र  व्यापारीलाई अनुरोध गरेको छ ।

प्रतिक्रिया