‘कू‘ गर्न खोजेको होइन– राजापाक्छे

कोलम्बो, २९ पुस । श्रीलङ्काका निवर्तमान राष्ट्रपति महिन्दा राजापाक्छेले आफूले निर्वाचन हारेपछि सैनिक कू गर्न खोजेको भनी आफूमाथि लगाइएको आरोप अस्वीकार गर्नुभएको छ ।

श्रीलङ्कामा गत बिहीबार सम्पन्न राष्ट्रपतीय निर्वाचनमा उहाँको पराजय भएको थियो । उहाँले आफूले निर्वाचन हारेपछि जनमतको कदर गर्ने भन्दै सत्ता छोड्नुभएको थियो ।

तरपनि कतिपय सत्तापक्षीय व्यक्तिहरुले उहाँले कू गर्न खोजेको भनी त्यस आरोपलाई चर्चामा ल्याएकोमा राजापाक्छेले सो भनाईको खण्डन गर्नुभएको हो ।

राजापाक्छेले मङ्गलबार आफ्नो ट्वीटर अकाउण्टमा सो प्रतिक्रिया दिनुभएको छ । उहाँले भन्नुभएको छ– मैले जनमतको कदर गर्नुपर्छ भनेर नै सहजै सत्ताबाट हटेको हो, कू गर्ने भन्ने बारेमा मलाई केही थाहा भएन ।

उहाँले सो अकाउन्टमा भन्नुभएको छ– मैले मतगणना सकिनासाथै सरकारी कार्यालय छोडेको हूँ र नवनिर्वाचित अध्यक्षलाई तत्कालै बधाई पनि दिएको हूँ ।

उहाँले आफु सधैँ जनताको मतको अगाडि झुक्ने भन्दै निर्वाचनमा जनताले आफ्नो विकल्प खोजेपछि आफुले अरु केही नसोचेको पनि स्पष्ट गर्नुभएको छ ।

राजापाक्छे सन् २००५ देखि श्रीलङ्कामा सत्तामा रही आउनुभएको छ । उहाँको हालैका दिनमा नातावादमा बढी फसेको भनी आलोचना हुने गरेको थियो ।

नवनियुक्त राष्ट्रपति मैत्रीपाला सिरिसेनाको प्रशासनले राजापाक्छेले आफुले निर्वाचन हारेपछि सैनिक कू गर्न सैनिक प्रमुखलाई भनेको तर सैनिक प्रमुखले नमानेपछि उहाँ बाध्य भएर सरकारी निवासबाट बाहिरिएको बताएको थियो ।

यस विषयमा छानबीन समिति गठन गरी छानबीन गर्ने जानकारी नयाँ प्रशासनले हालै दिएको छ । रासस÷एएफपी