शुक्रबार, मंसिर १२ २०७७
काठमाडौं ०८:२९
वासिङटन डिसी 21:44

प्रधानमन्त्रीद्वारा उद्योगी बिएल शर्माको पार्थिव शरीरमा श्रद्धाञ्जलि अर्पण

इनेप्लिज २०७१ पुष २९ गते ९:२० मा प्रकाशित

काठमाडौँ, २९ पुस । प्रधानमन्त्री सुशील कोइरालाले व्यवसायी तथा उद्योगी बिएल शर्माको पार्थिव शरीरमा आज श्रद्धाञ्जलि दिनुभएको छ ।

गएको आइतबार ९१ वर्षमा निधन हुनुभएका शर्माको पार्थिव शरीरलाई आज श्रद्धाञ्जलि दिन नयाँ बानेश्वरस्थित अनमोल क्याटरिङमा राखिएको छ ।

उहाँलाई श्रद्धाञ्जलि दिन उक्त स्थानमा पूर्व प्रधानमन्त्रीहरु सूर्यबहादुर थापा, झलनाथ खनाल, माधवकुमार नेपाल र शेरबहादुर देउवा, नेपाली काँग्रेसका उपसभापति रामचन्द्र पौडेल, उपप्रधानमन्त्री वामदेव गौतम, सञ्चारमन्त्री डा मीनेन्द्र रिजाल, कानुन तथा न्यायमन्त्री नरहरि आचार्यलगायत उद्योगी, समाजसेवी तथा सर्वसाधारणको उपस्थिति थियो ।

थापाथलीस्थित नर्भिक अन्तर्राष्ट्रिय अस्पतालमा उपचारका क्रममा निधन भएका शर्माका श्रीमती र तीन छोरी हुनुहुन्छ । स्व शर्माको शवयात्रा गरी निवासस्थान बाफलमा पु¥याइएपछि विधिपूर्वकका कार्य गरी आजै अन्त्येष्टि गरिने उहाँका व्यावसायिक साझेदार शिव सरावगीले जानकारी दिनुभयो ।

नेपालमा विसं २००७ को प्रजातान्त्रिक आन्दोलनका क्रममा तत्कालीन राजा त्रिभुवनको नजिक रही सम्पर्क माध्यमका रुपमा कार्य गर्नुभएका शर्माले नेपालमा मिठाई व्यवसाय तथा क्याटरिङ व्यवसायलाई संस्थागत गर्न ठूलो योगदान पु¥याउनुभएको थियो ।

त्यस्तै, डकोटा (२८ सिट क्षमता, डिसी–३) विमान कलकत्ता र पटनाबाट काठमाडौँ उडान गराई नेपालमा विमान सेवा सुरु गर्न तथा काठमाडौँ, सिमरा, भैरहवा, पोखरा, नेपालगन्ज र दाङका विमानस्थल निर्माणमा योगदान गर्नुभएको थियो ।

भारतको चर्चित व्यावसायिक समूह ‘बिरला समूह’ लाई नेपाल भित्र््याउनु भएका शर्मा अनमोल क्याटरिङ सर्भिस प्रालिका संस्थापक अध्यक्ष तथा आम्रपाली वेङ्क्वेटका सञ्चालक हुनुहुन्थ्यो । उहाँ विसं २०११ मा सल्लाहकार सभामा मनोनीत समेत हुनुभएको थियो भने हाल पशुपति क्षेत्र विकास कोषका सदस्य हुनुहुन्थ्यो । विभिन्न राजनीतिक दलले आयोजना गर्ने जलपान समारोहको अधिकांश आयोजना शर्माकै क्याटरिङ उद्योगबाट हुने गरेको छ ।

त्यसैगरी, उहाँ रेडक्रस, क्षयरोग निवारण सङ्घ, परिवार नियोजन सङ्घ, रोटरी क्लब, श्री ५ त्रिभुवन स्मारक समिति, मारवाडी सेवा समिति, नेपाल भारत सम्पर्क मञ्च तथा मारवाडी ब्राह्मण समाजका संस्थापक अध्यक्ष हुनुहुन्थ्यो ।

उहाँले त्रिशक्तिपट्ट (तेस्रो र चौथो), सेवापदक, शुभराज्याभिषेक पदक (श्री ५ महेन्द्र, श्री ५ वीरेन्द्र), विप्र शिरोमणि पुरस्कार (अखिल भारतीय ब्राह्मण महासभा, दिल्ली) तथा विभिन्न सामाजिक सङ्घ संस्थामार्फत सम्मान प्राप्त गर्नुभएको थियो ।

इन्टरमिडियटसम्मको अध्ययन गर्नुभएका उहाँले रुसबाहेक युरोपका सबै देश र संयुक्त राज्य अमेरिकालगायतका मुलुकको भ्रमण गर्नुभएको थियो । उहाँले ‘राष्ट्रपिता र म’ नामक कृति प्रकाशन गर्नुभएको थियो ।

प्रतिक्रिया