इटहरीमा बन्द खोल्ने सहमति

इटहरी, २९ पुस । उद्योग वाणिज्य सङ्घ इटहरी र बन्दकर्ता राजनीतिक दलबीच आज बिहान भएको वार्तापछि मध्याह्न १२ः३० बजेदेखि इटहरी र आसपासका क्षेत्रका बजार पसल खुलाउने सहमति भएको छ ।

लगातारको बन्दले उद्योगी व्यापारी र व्यवसायी मारमा परिरहेको भन्दै उद्योग वाणिज्य सङ्घले बन्द धेरै भयो भनेर राजनीतिक दललाई आन्दोलनको स्वरुपमा परिवर्तन ल्याउनसमेत आग्रह गरेका छन् ।

यसैक्रममा बन्द गर्ने राजनीतिक दलका तर्फबाट इटहरी उपमहानगरपालिका–८ स्थित कस्तुरी चोकमा दुईवटा सवारी साधन तोडफोड गरेका छन् । उद्योग वाणिज्य सङ्घ र राजनीतिक दलबीच बन्द खुलाउने विषयमा छलफल चलिरहँदा एकाएक को १ ख ३९५० नम्बरको टिपर र को १ ख १०१० नम्बरको बसको सिसा फुटाइदिएका छन् ।

विराटनगर उपमहानगरपालिकाको रानीबाट हिजो शव लिएर राजविराज गएर आज फर्कने क्रममा बस तोडफोडमा परेको थियो । बसको सम्पूर्ण सिसा फुटाइएको छ भने टिपरको अगाडिको सिसामा ढुङ्गा हानिएको छ ।

उद्योग वाणिज्य सङ्घका केन्द्रीय सदस्य तथा इटहरी अध्यक्ष रोहित प्रसाईं र उद्योग वाणिज्य सङ्घ पूर्वाञ्चल अध्यक्ष टङ्क दुलालले बन्दले व्यापारीहरु उठ्नै नसक्ने अवस्थामा पुगिसकेकाले बारम्बारको बन्द गर्ने परिपाटीलाई राजनीतिक दलहरूले परिवर्तन गर्नु पर्नेमा जोड दिएका थिए ।

नागरिक समाज इटहरीका अध्यक्ष डानियल सुब्बाले पनि मानिसले धान्न नै नसक्ने गरी भइरहेको बन्दलाई राजनीतिक दलहरुले स्वरुपमा परिवर्तन ल्याएर तोकिएको समयमा संविधान जारी गर्न दबाब दिन आग्रह गर्नुभएको छ ।

छलफलमा राजनीतिक दलका तर्फबाट शिव डाँगी, राम राई, गोविन्दजङ्ग कार्कीलगायतले बन्द खुलाउन सहमति जनाउनुभएको थियो । बन्दलाई सहज रुपमा लैजानका लागि आफूहरु पनि सहमत भएको भन्दै राजनीतिक दलका नेताहरुले व्यापारिक क्षेत्रमा प्रतिकूल असर पार्ने आफ्नो उद्देश्य नभएको उल्लेख गरेका थिए ।