शनिबार, मंसिर १३ २०७७
काठमाडौं ११:२६
वासिङटन डिसी 00:41

अतिवादीहरू संविधानको बाधक: उपसभापति पौडेल

इनेप्लिज २०७१ पुष २८ गते १६:५१ मा प्रकाशित

ramchandra-paudel

काठमाडौँ, २९ पुस । नेपाली काँग्रेसका उपसभापति रामचन्द्र पौडेलले अतिवादीहरूका कारण संविधान निर्माणको काम अन्यौलमा परेको बताउनुभएको छ ।

उहाँले मुलुकको हितभन्दा सस्तो लोकप्रियताका लागि अनावश्यक मुद्दा उच्चाल्नेहरूका कारण मुलुक बन्धकमा परेको धारणा राख्नुभयो ।

नेपाल जेसिजले सोमबार राजधानीमा आयोजना गरेको ‘संविधान र माघ ८’ विषयक अन्तरक्रिया कार्यक्रममा उपसभापति पौडेलले अनेक बहनामा मुलुकमा पटकपटक लोकतन्त्रमाथि आक्रमण भइरहने गरेको गुनासो गर्नुभयो ।

उपसभापति पौडेलले २०१५ सालको उपलब्धि राष्ट्रवादका नाममा, २०४७ सालको उपलब्धि जनवादका नाममा र अहिले २ं०६३ सालको उपलब्धि फेरि जातिवादका नाममा शिकार हुनु परेको दृष्टान्त दिनुभयो ।

उहाँले जातीय पहिचान र अधिकारका नाममा जातीय अधिकार नै खोज्ने खेल भइरहेको टिप्पणी गर्दै देशभरका विभिन्न ठाउँमा फैलिएका जातिहरूलाई मुलुकको कुनै निश्चित ठाउँमा मात्र सीमित गर्ने जातीय राज्य दिनु आफैँमा अलोकतान्त्रिक, अवैज्ञानिक र प्रतिगामी हुने उपसभापति पौडेलको ठम्याइ छ ।

कार्यक्रममा एकीकृत माओवादीका सचिव वर्षमान पुनले जातीयताको मुद्दा अझै पनि पर्याप्त सम्बोधन हुन नसकेको बताउनुभयो ।

उहाँले शीर्ष नेताहरूको बैठकमा खस आर्यहरूको र मधेसीहरूको प्रतिनिधित्व भएपनि आदिवासी जनजातिहरूको प्रतिनिधित्व हुन नसकेको तर्क गर्नुभयो ।

नेकपा–माओवादीका सचिव देव गुरुङले भने जनतालाई एक थान संविधानका लागि मात्र संविधानसभाको माग नगरिएको उल्लेख गर्दै अग्रगामी र जनताको संविधान दिन अहिलेको संविधानसभाले नसक्ने भएकाले आफूहरूले नयाँ सर्वपक्षीय राजनितिक सम्मेलनको माग गरेको स्पष्ट पार्नुभयो ।

कार्यक्रममा जेसिजका राष्ट्रिय अध्यक्ष धनन्यकुमार श्रेष्ठ र महासचिव जगत पोख्रेलले लोकतान्त्रिक संविधान निर्माणका लागि जेसिजले देशव्यापी दबाब अभियान चलाउने जानकारी दिनुभयो ।

प्रतिक्रिया