शुक्रबार, कार्तिक ७ २०७७
काठमाडौं १२:०४
वासिङटन डिसी 02:19

चारजनाको परिवार पाल्दै नेत्रहीन

इनेप्लिज २०७१ पुष २८ गते ६:०३ मा प्रकाशित

पथरी, २८ पुस । इच्छा शक्ति भए शारीरिक असक्षमताले केही फरक पार्दैन भन्ने कुरालाई विराटनगरका ३८ वर्षीय चिरञ्जीवी शर्माले चरितार्थ गर्नुभएको छ ।

विराटनगर–८ शनि मन्दिर रोडमा बस्दै आएका शर्मा जन्मदै दृष्टिविहीन भएपनि  दैनिक कठोर शारीरिक श्रम गर्नुहुन्छ । उहाँ नियमित रूपमा विराटनगरको रोड शेषचोकबाट भारी बोकेर जनआन्दोलन चोकमा रहेको होलसेल पसलमा अर्डरको सामान पु¥याउन जाने गर्नुहुन्छ । उहाँ दैनिक जोखिमपूर्ण अवस्थामा भारी बोकेर विराटनगरको मेनरोडका विभिन्न किराना पसलमा सामान पु¥याउनुहुन्छ ।

शर्माले सीमावर्ती बजार जोगवनीबाट होलसेलमा सामान खरिद गरेर विराटनगरका व्यापारीलाई सामान सप्लाइ गर्ने काम गर्दै आउनुभएको छ । परिवारको गर्जाे टार्न उहाँले यस्तो कठोर श्रम गर्नु परेको बताउनुहुन्छ । उहाँका अनुसार पैतृक सम्पत्तिको नाममा शनिमन्दिर रोडमा रहेको चारधुर जग्गामा तीनजना दाजुभाइको परिवारको बसोबास छ । शर्माका १३ वर्षीया एक छोरी र १० वर्षीय छोरा छन् । आफूले संसार देख्न नपाए पनि कठोर शारीरिक श्रम गर्दै छोराछोरीलाई विराटनगरकै एभरेस्ट बोर्डिङ स्कुलमा अध्यापन गराउँदै आएका छन् ।

सो स्कुलले दुईमध्ये एकजनालाई निःशुल्क गरीदिएको शर्माले बताउनुभयो । आफू दृष्टिविहीन भए पनि राज्यबाट पाइने सेवासुविधा आफूले पाउन नसकेको शर्माको भनाइ छ । दृष्टिविहीन शर्माको क्षमता र पौरख देखेर उहाँसँग सामान खरिद गर्ने व्यापारीसमेत छक्क पर्ने गरेका छन् ।

शर्मासँग दैनिक सरसामान खरिद गर्ने हिमालय रोडनजिक पसल रहेका व्यापारी प्रेम प्रधान शर्माको क्षमताको प्रशंसा गर्नुहुन्छ । शर्मा प्रत्येक हप्ताको शनिबार र मङ्गलबार विराटनगरस्थित मेनरोडमा रहेका व्यापारीलाई कागती र खोर्सानी उनेर बनाएको मालासमेत बेच्ने गर्नुहुन्छ ।

उहाँको यो काममा शर्माको श्रीमती र छोराछोरीले सघाउने गरेका छन् । दृष्टिविहीन भएर पनि आफ्नै पौरखले आफूसहित परिवारको पालनपोषण गर्दै बालबालिकालाई समेत राम्रो शिक्षादीक्षा दिलाइरहेका  शर्मा दृष्टि भएकाका लागिसमेत प्रेरणाका स्रोत बन्दै आउनुभएको छ ।

प्रतिक्रिया