पत्रकार उमा सिंहको स्मृति दिवस मनाइयो

जनकपुरधाम, २८ पुस । पाँच वर्षअघि हत्या गरिएका पत्रकार उमा सिंहको छैटौँ स्मृति दिवस विभिन्न कार्यक्रमको आयोजना गरी हिजो यहाँ मनाइयो ।

स्थानीय रेडियो टुडेमा कार्यरत पत्रकार सिंहको २०६५ पुस २७ गते जनकपुर–१४ रजौलस्थित डेरामा बसिरहेको बेला अपराधीले धारिलो हतियार प्रयोग गरी निर्ममतापूर्वक हत्या गरेका थिए ।

यसैगरी स्वर्गीय उमासिंहको छैटौँ स्मृति दिवसका अवसरमा नेपाल पत्रकार महासङ्घ धनुषा शाखाले ‘पत्रकारिता र सुरक्षा’ विषयक विचार गोष्ठीको आयोजना गरेको छ ।

महासङ्घका धनुषा अध्यक्ष अनिलकुमार मिश्रको सभापतित्वमा भएको गोष्ठीमा महासङ्घका केन्द्रीय सदस्य अजय अनुरागी, निवर्तमान जिल्ला अध्यक्ष रामअशीष यादव, पार्षद् विएम खनाल, पत्रकार रामभरत साह, मधेसी पत्रकार समाजका केन्द्रीय सचिव आतिश मिश्रलगायतले पत्रकारले झेल्नुपरेका समस्याका साथै उनीहरूको हकहितका लागि सबै एकजुट हुनु पर्नेमा जोड दिनुभएको थियो । रासस