राष्ट्रपति डा यादवद्वारा श्रीलङ्काली राष्ट्रपतिलाई बधाई

काठमाडौँ, २७ पुस । राष्ट्रपति डा रामवरण यादवले श्रीलङ्काको राष्ट्रपतिमा मिथारिपाला सिरीसेना निर्वाचित हुनुभएकामा हार्दिक बधाई दिनु भएको छ ।

राष्ट्रपति यादवले उहाँलाई नेपाल सरकार, नेपाली जनता र स्वयम् आफ्नातर्फबाट आज एक बधाई सन्देश पठाउँदै श्रीलङ्काको राष्ट्रपतिको उच्च पदमा निर्वाचित हुनुभएकामा बधाई ज्ञापन गर्नुभएको हो ।

सन् १९५७ जुलाईमा नेपाल र श्रीलङ्कबीच कूटनीतिक सम्बन्ध स्थापना भएयता दुवै मुलुकबीच सौहार्दपूर्ण सम्बन्ध रहेको चर्चा गर्दै उहाँले राष्ट्रपति सिरीसेनाको सवल नेतृत्वमा त्यो सम्बन्ध अझ प्रगाढ हुने विश्वास व्यक्त गर्नुभएको छ ।

सन्देशमा राष्ट्रपति यादवले श्रीलङ्काली आफ्ना समकक्षीको कार्यकालको सफलताको शुभकामना व्यक्त गर्नुका साथै श्रीलङ्काका जनतामा शान्ति र समृद्धिको कामना गर्नुभएको छ ।