प्रधानमन्त्रीले भने-दलहरुबीच विवाद आएको भन्ने हल्ला झूठो हो

काठमाडौं, १५ पुस । प्रधानमन्त्री सुशील कोइरालाले आन्दोलन छाडेर देशको विकास र शान्ति स्थापनामा क्रियाशील हुन सबैलाई आग्रह गरेका छन् । देशमा आन्दोलन नभइ अमन चयन आवश्यक रहेको उनले बताए ।

तस्बिर :मुकुन्द कालिकोटे

तमु ल्होसारको अवसरमा मंगलबार काठमाडौंको टुँडिखेलमा आयोजित कार्यक्रमलाई सम्वोधन गर्दै कोइरालाले भने, ‘अब आन्दोलनका दिन गए, तपाईंहरु शान्ति र यमन चयन दिनुस् हामी गरेर देखाउँछौं, यहाँ मुलुकको भविष्यको कुरा छ ।’

तस्बिर:मुकुन्द कालिकोटे

भारत, चीन लगायतका छिमेकी देशले पनि नेपालमा छिटो संविधान जारी होस् भन्ने चाहेको भन्दै कोइरालाले संविधान निर्माण प्रक्रियालाई कसैले रोक्न नसक्ने स्पष्ट पारे ।

समयमा संविधान जारी गर्ने काममा सरकार चिन्तित भएको प्रधानमन्त्री कोइरालाले बताए । दलहरुबीच विवाद आएको भन्ने हल्ला सही नभएको उनले दाबीसमेत गरे । अब बन्ने नयाँ संविधानमा सबै जातजाति भाषाभाषी र समुदायको उचित सम्मान हुने उनको भनाइ थियो । ‘राजनीतिक दल, सभामुख जी सबै चिन्तित हुनुहुन्छ, यसबाट सुखद परिणाम दिने मैले विश्वास लिएको छु,’ प्रधानमन्त्री कोइरालाले भने ।

तस्बिर: मुकुन्द कालिकोटे

वार्ता, सहमति, सहकार्य, एकता र मेलमिलापबाट अघि बढ्ने भन्दै उनले यसबाटै देश विकासको लहर आउने दाबी गरे ।